அப்பாநான்

அப்பாநான் பற்பலகால் அறைவதென்னே அடியேன் 

அச்சம்எலாம் துன்பம்எலாம் அறுத்துவிரைந் துவந்தே 
இப்பாரில் இதுதருணம் என்னைஅடைந் தருளி 

எண்ணம்எலாம் முடித்தென்னை ஏன்றுகொளாய் எனிலோ 
தப்பாமல் உயிர்விடுவேன் சத்தியஞ்சத் தியம்நின் 

தாளிணைகள் அறிகஇது தயவுடையோய் எவர்க்கும் 
துப்பாகித் துணையாகித் துலங்கியமெய்த் துணையே 

சுத்தசிவா னந்தஅருட் சோதிநடத் தரசே

அப்பாநான் வேண்டுதல்கேட் டருள்புரிதல் வேண்டும் 

ஆருயிர்கட் கெல்லாம்நான் அன்புசெயல் வேண்டும் 
எப்பாரும் எப்பதமும் எங்கணும்நான் சென்றே 

எந்தைநின தருட்புகழை இயம்பியிடல் வேண்டும் 
செப்பாத மேனிலைமேல் சுத்தசிவ மார்க்கம் 

திகழ்ந்தோங்க அருட்சோதி செலுத்தியிடல் வேண்டும் 
தப்பேது நான்செயினும் நீபொறுத்தல் வேண்டும் 

தலைவநினைப் பிரியாத நிலைமையும்வேண் டுவனே