Vallalar.Net
Vallalar.Net

ஏதும்அறி

பாடல் எண் :3053
ஏதும்அறி யாதிருளில் இருந்தசிறி யேனை

எடுத்துவிடுத் தறிவுசிறி தேய்ந்திடவும் புரிந்து
ஓதுமறை முதற்கலைகள் ஓதாமல் உணர

உணர்விலிருந் துணர்த்திஅருள் உண்மைநிலை காட்டித்
தீதுசெறி சமயநெறி செல்லுதலைத் தவிர்த்துத்

திருஅருண்மெய்ப் பொதுநெறியில் செலுத்தியும் நான்மருளும்
போதுமயங் கேல்மகனே என்றுமயக் கெல்லாம்

போக்கிஎனக் குள்ளிருந்த புனிதபரம் பொருளே
பாடல் எண் :4883
ஏதும்அறி யாச்சிறிய பயல்களினும் சிறியேன் 

இப்பெரிய வார்த்தைதனக் கியானார்என் இறைவன் 
ஓதுகநீ என்றபடி ஓதுகின்றேன் மனனே 

உள்ளபடி சத்தியம்ஈ துணர்ந்திடுக நமது 
தீதுமுழு தும்தவிர்த்தே சித்திஎலாம் அளிக்கத் 

திருவருளாம் பெருஞ்ஸோதி அப்பன்வரு தருணம் 
ஈதிதுவே என்றுலகம் அறியவிரைந் துரைப்பாய் 

எல்லாரும் களிப்படைந்துள் இசைந்தேத்தி யிடவே