Vallalar.Net
Vallalar.Net

தத்துவம்

பாடல் எண் :4031
தத்துவம் அனைத்தும் தவிர்த்துநான் தனித்த 

தருணத்தில் கிடைத்ததொன் றென்கோ 
சத்துவ நிரம்பும் சுத்தசன் மார்க்கந் 

தனில்உறும் அனுபவம் என்கோ 
ஒத்துவந் தெனைத்தான் கலந்துகொண் டெனக்குள் 

ஓங்கிய ஒருமையே என்கோ 
சித்துவந் தாடுஞ் சித்தனே என்கோ 

திருச்சிற்றம் பலத்தவ நினையே
பாடல் எண் :4564
தத்துவம் எல்லாமாம் ஸோதி - அந்தத் 

தத்துவம் எல்லாம் தருவிக்கும் ஸோதி 
அத்துவி தப்பெருஞ் ஸோதி - எல்லாம் 

அருளில் விளங்க அமர்த்திய ஸோதி  சிவசிவ
பாடல் எண் :4623
தத்துவம் அனைத்தும் தனித்தனி கடந்தேம் 

தத்துவா தீதமேல் நிலையில் 
சித்தியல் முழுதும் தெரிந்தனம் அவைமேல் 

சிவநிலை தெரிந்திடச் சென்றேம் 
ஒத்தஅந் நிலைக்கண் யாமும்எம் உணர்வும் 

ஒருங்குறக் கரைந்துபோ யினம்என் 
றத்தகை உணர்ந்தோர் வழுத்தநின் றோங்கும் 

அருட்பெருஞ் சோதிஎன் அரசே
பாடல் எண் :4649
தத்துவம் எல்லாம்என் தன்வசம் ஆக்கிச் 

சாகாவ ரத்தையும் தந்தெனைத் தேற்றி 
ஒத்துவந் துள்ளே கலந்துகொண் டெல்லா 

உலகமும் போற்ற உயர்நிலை ஏற்றிச் 
சித்திஎ லாம்செயச் செய்வித்துச் சத்தும் 

சித்தும் வெளிப்படச் சுத்தநா தாந்த 
அத்திரு வீதியில் ஆடச்செய் தீரே 

அருட்பெருஞ் ஸோதிஎன் ஆண்டவர் நீரே