Vallalar Songs

வேதாந்த நிலையாகிச் சித்தாந் தத்தின்

மெய்யாகிச் சமரசத்தின் விவேக மாகி
நாதாந்த வெளியாகி முத்தாந் தத்தின்

நடுவாகி நவநிலைக்கு நண்ணா தாகி
மூதாண்ட கோடியெல்லாம் தாங்கி நின்ற

முதலாகி மனாதீத முத்தி யாகி
வாதாண்ட சமயநெறிக் கமையா தென்றும்

மவுனவியோ மத்தினிடை வயங்குந் தேவே

வேதாந்த சித்தாந்தம் என்னும்அந்தம் இரண்டும்

விளங்கஅமர்ந் தருளியநின் மெல்லடிகள் வருந்த
நாதாந்த வெளிதனிலே நடந்தருளும் அதுபோல்

நடந்தருளிக் கடைநாயேன் நண்ணும்இடத் தடைந்து
போதாந்த மிசைவிளக்குந் திருமேனி காட்டிப்

புலையேன்கை யிடத்தொன்று பொருந்தவைத்த பொருளே
சூதாந்த மனைத்தினுக்கும் அப்பாற்பட் டிருந்த

துரியவெளிக் கேவிளங்கும் பெரியஅருட் குருவே

வேதாந்த நிலைநாடி விரைந்துமுயன் றறியேன்

மெய்வகையும் கைவகையும் செய்வகையும் அறியேன்
நாதாந்தத் திருவீதி நடந்திடுதற் கறியேன்

நான்ஆர்என் றறியேன்எங் கோன்ஆர்என் றறியேன்
போதாந்தத் திருநாடு புகஅறியேன் ஞான

பூரணா காயம்எனும் பொதுவைஅறி வேனோ
ஏதாந்தீ யேன்சரிதம் எங்ஙனம்நான் புகுவேன்

யார்க்குரைப்பேன் என்னசெய்வேன் ஏதும்அறிந் திலனே

வேதாந்த நிலையொடு சித்தாந்த நிலையும் 

மேவும் பொதுநடம் நான்காணல் வேண்டும் 
நாதாந்தத் திருவீதி நடப்பாயோ தோழி 

நடவாமல் என்மொழி கடப்பாயோ தோழி

வேதாந்த நிலையும்அதன் அந்தத்தே விளங்கும் 

மெய்ந்நிலையும் காட்டுவித்தீர் விளங்கியசித் தாந்தப் 
போதாந்த நிலையும்அப்பால் புகல்அரிதாம் பெரிய 

பொருள்நிலையும் தெரிவித்தீர் புண்ணியரே நுமது 
பாதாந்தம் அறிவித்தீர் சுத்தவடி வுடனே 

பகர்பிரண வாகாரப் பரிசும்எனக் களித்தீர் 
நாதாந்தத் தனிச்செங்கோல் நான்செலுத்தக் கொடுத்தீர் 

நடராஜ ரேநுமக்கு நான்எதுசெய் வேனே

வேதாந்த பராம்பர ஜயஜய() 
நாதாந்த நடாம்பர ஜயஜய   
 () சவுதய - ஆ பா பதிப்பு